Featured Posts

மஹாபெரியவாளின் அற்புதச்சாரல்கள்


மஹாபெரியவாளின் அற்புதச்சாரல்கள்

தாயிற்சிறந்த கோயிலுமில்லை

தந்தை சொல்மிக்க மந்திரமில்லை”

இந்த அற்புதசாரல்களின் நாயகன் சுரேஷ் ஒரு பட்டதாரி. நாயகி பவானியும் ஒரு பட்டதாரி. சுரேஷ் கை நிறைய சம்பாதித்துக்கொண்டிருந்த ஒரு பட்டதாரி இளைஞர். மனைவி பட்டதாரி இல்லத்தரசி. மஹாபெரியவாளின் ரா.கணபதி அண்ணா எழுதிய தெய்வத்தின் குரல் படித்த ஒரே இரவில் வாழும் முறை மாறிய அற்புதம். வாழ்க்கைமட்டுமா மாறியது. கணவன் மனைவி இருவருமே தங்களையும் மாற்றிக்கொண்டார்கள். அவர்கள் இருவரும் ஒவ்வொரு வினாடியும் வாழ்க்கையை அனுபவித்து வாழ்கிறார்கள்.

அவர்கள் வாழும் ஊர் கோயம்பத்தூர். நவீன வாழ்க்கை முறை, நவீன ஆடை ஆபரணங்கள் இவைகளுக்கிடையே தங்கள் வாழ்க்கையை எவ்வளவு அழகாக அமைத்துக்கொண்டிருக்கிறார்கள்.

மனம் இருந்தால் மார்க்கம் உண்டு.

இவர்கள் நினைத்தமாதிரி வீடு கிடைத்தது. வேண்டியமாதிரி கோட்டை அடுப்பு கிடைத்தது. இதற்கு ஏற்றாற்போல் சமுதாயத்தில் மதிப்பும் மரியாதையும் கிடைத்தது. இவர்கள் இருவரும் வெளியில் போனாலே மற்றவர்கள் கண் த்ரிஷ்டியே பட்டுவிடும்.. அவ்வளவு அழகு. இது என் அலங்கார எழுத்துக்கள் மட்டும் அல்ல என் ஆழ் மன பாராட்டுதலின் வெளிப்பாடு.

இந்த அற்ப்புச்சாரலின் முடிவில் வீடியோ லிங்க் கொடுத்துள்ளேன். விடியோவை பார்ப்பதற்கு முன் நீங்கள் செய்ய வேண்டியது இதுதான்.

1 மஹாபெரியவா நமக்கு சொல்லிக்கொடுத்த படாடோபம் இல்லாத வாழ்கை முறையை ஞாபகத்தில் கொள்ளுங்கள்..

2 நீங்கள் கண்ட கனவின் தொகுப்பு (சில வரிகள் படித்தபின் நீங்கள் கனவு காணப்போகிறீர்கள். அந்தக்கால வாழ்க்கைமுறைக்கு உங்களை அழைத்துப்போகப்போகிறேன்.)

3 சுரேஷ்-பவானி சொல்லும் வாழ்க்கை முறை, எப்படி ஒரு இரவில் தெய்வத்தின் குரல் அவர்கள் வாழ்க்கையை புரட்டி போட்டது.

இவை மூன்றையும் இணைத்து உங்கள் மனத்திரையில் படமாக ஓட்டிப்பாருங்கள். உங்களுக்கு ஓர் புதிய அனுபவம் கிடைக்கும். மஹாபெரியவாளின் விஸ்வரூப தரிசனத்தை காணுவீர்கள்.

மஹாபெரியவா நம்மிடையே

சூஷ்மமாக மட்டும் இல்லை

ஸ்தூலமாகவும் நம்முடன்

வாழ்ந்துகொண்டிருக்கிறார்

என்பதை நீங்கள் உணர்வீர்கள்

மஹாபெரியவா பெற்றோர்களுக்கு கொடுக்க வேண்டிய மதிப்பையும் மரியாதையையும் தன் இறுதி மூச்சு இருக்கும் வரை சொல்லிக்கொண்டிருந்தார். இந்த அற்புதச்சாரலை நம்மைப்பெற்ற பெற்றோர்களுக்கு சமர்ப்பணம் செய்வது பொருத்தமாக இருக்கும் என்று நினைக்கிறேன். மஹாபெரியவாளும் மகிழ்ந்து போவார்

ஹர ஹர சங்கர ஜய ஜய சங்கர

நமக்கு உயிர் கொடுத்த தாயும், உலகிற்கு நம்மை அறிமுகப்படுத்திய தந்தையும் நாம் உலகம் தெரியாத குழந்தையாக இருந்தபோது நம்மை உச்சி முகர்ந்து வயிறு வாடாமல் பார்த்த பார்த்து வளர்த்தது பெற்றோர்கள்தானே. நமக்கு கண்ணுக்கு தெரிந்த கடவுளும் அவர்களே. பெற்றோர்களுக்கு கோவில் கட்டச்சொல்லவில்லை. பெற்றோர்களை வீட்டிலேயே வைத்துக்கொண்டு வாழும் வீட்டை கோவிலக்கலாமே.

ஆனால் உண்மை என்ன ? இன்று வயதான முடியாத தள்ளாத வயதிலும் பெரும்பாலான பெற்றோர்களை முதியோர் இல்லத்தில்தானே காணமுடிகிறது..

நெஞ்சு பொறுக்குதில்லையே

இந்த நிலை கேட்ட மாந்தரை

நினைத்துவிட்டால்

என்னும் பாரதியின் மனக்குமுறலின் வார்த்தைகள் உங்கள் காதில் விழுகிறதில்லயா. எனக்கும் அப்படிதான். என் மனக்குமுறலின் மொத்த வெளிப்பாடுதான் இந்தச்சரால்.

நான் இந்த அற்புதசாரலில் முதியோர்கள் வயதான காலத்தில் படும் இன்னல்களை என் மனக்குமுறலுடன் விவரித்திருக்கிறேன். இன்றும் பெற்றோர்களுக்கு கோவில் கட்டி கும்பிட்டுக்கொண்டிருக்கிற இளைஞர்கள் இருக்கிறார்கள். விதி விலக்காக இங்கொன்றும் அங்கொன்றுமாக தெரிகின்றார்கள். அவர்களுக்கு என் நமஸ்கரங்கள்.

வீட்டில் பார்த்துக்கொள்ளமுடியாத மனுஷ சகாயமும் இல்லாமல் திணறும் குழந்தைகளுக்கு முதியோர் இல்லத்தை விட்டால் வேறு வழியில்லை என்பது புரிந்துகொள்ளக்கூடிய ஒன்று. ஆனால் வசதியிருந்தும் வீட்டில் எல்லா வித சௌகரியங்கள் இருந்தும் பெற்றோர்களை முதியோர் இல்லத்தில் விடும் குழந்தைகளை நாம் என்ன சொல்லமுடியும். அவர்களாக பார்த்து திருந்தாவிட்டால் அந்த இறைவன் தான் திருத்த வேண்டும். அவர்களுக்காகத்தான் பெரியவா ஆசியுடன் இந்த கட்டுரை.

விதிவிலக்கெலாம் விதியாக மாறிவிடாது. இந்த அற்புதசாரல்கள் ஒரு சில மனிதர்களை திருத்தினாலும் எனக்கு மன நிம்மதி. மஹாபெரியவாளும் என்னுடைய இந்த முயற்சிக்கு ஆசிர்வாதம் செய்வார் என்று நிச்சயமாக எனக்கு தெரியும். ஏன் தெரியுமா?

சுரேஷ் பவானி தம்பதியினரும் இந்தக்கால இளைஞர்களே. இவர்கள் வாழ்க்கை ஒரே இரவில் தலைகீழாக மாறியதென்றால் முதியோர் இல்லத்தில் இருக்கும் பெற்றோர்கள் வீடு வந்து சேர எத்தனை இரவுகள் வேண்டும். இது ஒரு பேராசைதான். என்ன செய்வது. இதனால் தான் இந்தச்சாரலில் முதியோர்களையும் முதியோர் இல்லங்களையும் எடுத்துக்கொண்டேன்.

அற்புதத்தை மட்டும் எழுதலாம் என்றிருந்த என்னை, ஏதோ ஒரு சக்தி என்னையும் அறியாமல் பெற்றோர்களின் இன்றைய நிலை பற்றி எழுத நிர்பந்தித்தது. சரியான வார்த்தைகளை தேடும்பொழுதேல்லாம் வார்த்தைகள் தானாகவே தெறித்து வந்து விழுந்தன. சரியான வார்த்தைகள் சிதறி தெறித்து விழுந்த விதம் என்னை நிலைகுலைய செய்துவிட்டது.

எந்த சக்தி என்னை எழுதவைத்ததோ அந்த சக்திக்கு மரியாதையை செலுத்தும் பொருட்டு எதையும் மாற்றாமல் அப்படியே எழுதியுள்ளேன். சற்று நீண்ட போஸ்ட்டாக இருந்தாலும் வந்து விழுந்த விஷயங்களின் முக்கியதுவம் கருதி பொறுமையுடன் படிக்கவும்.

சிதறி விழுந்த வார்த்தைகள் எங்கிருந்து வந்தன

இன்னுமா சந்தேகம்

மஹாபெரியாவாளிடத்தில் இருந்துதான்

எப்பவுமே என் எழுத்துக்கள் யார் மனதையும் புண்படுத்தாது. இந்த அற்புதசாரல்களில் கூட என் மனக்குமுறல்கள் சற்று அதிகமாக இருந்தாலும் வந்து விழுந்த வார்த்தைகள் அந்த இறை சக்தியின் வெளிப்பாடுதான்.

பரமேஸ்வரன் பெரியவா இல்லாமல்

ஒரு அணுவும் அசையாது.

இந்த அற்புதசாரலில் நான் அனுபவித்த ஒரு புது அனுபவம் உங்களையும் அனுபவிக்க அழைக்கிறேன். வாருங்கள் சேர்ந்து அனுபவிப்போம். .

நாம் இதுவரை மஹாபெரியவா சொன்ன சொற்கள் நிகழ்த்திய அற்புதங்களை அனுபவித்தோம். மஹாபெரியவா உடல் மொழி நிகழ்த்திய அற்புதங்களை அனுபவித்தோம். மஹாபெரியவா நினைவுகள் நிகழ்த்திய அற்புதங்களை அனுபவித்தோம். ஆனால் மஹாபெரியவா உரைகளை தொகுத்து வழங்கிய ரா.கணபதி அண்ணா எழுதிய புத்தகம் ““தெய்வத்தின் குரல்” நிகழ்த்திய அற்புதம் தெரியுமா உங்களுக்கு.

நாம் காணும் கனவும், மஹாபெரியவா அற்புதமும், மஹாபெரியவாளின் சிந்தனை சிதறல்களும் சுரேஷ் பவானி வாழ்க்கை முறை எல்லாம் ஒரே நேர்கோட்டில் இருப்பதை நாம் நிச்சயமாக உணர்வோம்..

நம்முடைய தாத்தா பாட்டி வாழ்ந்த காலத்திற்கு செல்வோம். உங்கள் கனவு தொடங்கிவிட்டது. வாழ்ந்த காலம் இருபதாம் நூற்றாண்டு தொடக்கம்.. தமிழ் நாட்டின் எந்த ஒரு நகரத்தையும் நினைவில் வைத்துக்கொள்ளுங்கள். உங்கள் கனவு அந்த நகரத்தில் இருந்து துவங்கட்டும்.

சூரிய உதயத்திற்கு முன் வரும் அருணோதயமும் வந்துவிட்டது. (சூரியனின் தேரோட்டியின் பெயர் அருணன்.. .ஒவ்வொரு நாளும் சூரிய உதயத்திற்கு முன் சூரிய உதயத்தை உலகிற்கு தெரியப்படுத்துபவன் அருணன்...இதனால் தான் சூரிய உதயத்திற்கு முன் வரும் இளஞ்சிவப்பு நிற உதய வான உதயத்தை அருணோதயம் என்று அழைக்கிறோம். இந்த அருணோதயத்தையும் உங்கள் பிள்ளைகளுக்கும் பேரக்குழந்தைகளுக்கும் சொல்லிக்கொடுங்கள். அவர்களும் பிற்காலத்தில் கனவு காணட்டும்.

நம்முடைய அழகான வாழ்க்கை முறையை

எங்கு தொலைத்தோம் எப்படி தொலைத்தோம்

இருக்கும் ஒரு சிலர் வாழும் நாம் தொலைத்த வாழ்க்கையை முறையை எப்பாடுபட்டாவது காப்பாற்றுவோம்

நம்முடைய வாழ்க்கை முறையை மீட்டெடுத்த சுரேஷ் பவானி நீடுழி வாழ வேண்டும்

அருணனின் உதயத்திற்கு முன் வீட்டு வாசலில் உள்ள வைக்கோல்போரின் மேல் நின்று கோழி கூவி நாள் விடிந்துவிட்டதை மக்களுக்கு தெரியப்படுத்தும். என்ன ஒரு இயற்கையின் ஏற்பாடு. இதைத்தான் இயற்கையோடு இயைந்த வாழ்க்கையோ..

கோழி கூவியபிறகு ஒவ்வொரு வீட்டு வாசலிலும் நீரால் வாசல் தெளிக்கும் சப்தம்.. வாசல் தெளித்த பின் பசுவின் சாணியை நீரில் கரைத்து மறுபடியும் வாசல் தெளித்துவிட்டு அரிசிமாவில் கோலம் போட ஆரம்பிப்பார்கள். வாசல் தெளித்து சாணிக்கரைசல் தெளித்து அந்த இடத்தில கோலம் போட்டு அந்த இடம் காய்ந்தபின் பார்த்தால் கண்ணுக்கு எவ்வளவு குளிர்ச்சியாக இருக்கும் தெரியுமா.

அந்த ஊரில் உள்ள கோயிலில் சுப்ரபாதம் ஒலித்துக்கொண்டிருக்கும். வாசலில் லட்சுமி கடாக்ஷம் கோவில் சுப்ரபாதத்தில் லக்ஷ்மியின் கணவர் ஸ்ரீமான் நாராயணன். சொர்கம் இங்கே தான் இருந்தது. நாம் வாழும் கலிகாலம் சொர்க்கத்திற்கும் விடைகொடுத்து மேலே அனுப்பிவிட்டது..

வீட்டு வாசலில் துள்ளியோடும் கன்றுக்குட்டி. தாய் பசு கண்டிப்பான குரலில் கண்டன்றுக்குட்டியை பால் குடிக்க அழைக்கும் "அம்மா" என்னும் குரல். தாயின் குரலுக்கு கட்டுப்பட்டு துள்ளிவிளையாடிய கன்றுக்குட்டி தாயின் மடியை முட்டி முட்டி பால் குடிக்கும் அழகு.

வீட்டு வாசலில் சாய் நாற்காலியில் உட்கார்ந்துகொண்டு குழந்தைகளுக்கு ஓடி விளையாடு பாப்பா என்னும் பாரதியார் பாடலை தாத்தா சொல்லிக்கொடுத்துக்கொண்டிருப்பார். மனைவி கள்ளிச்சொட்டு போன்ற பாலில் காப்பி கலந்து கணவனுக்கு கொண்டு வந்து கொடுப்பாள். கணவரும் ரேடியோவில் ஒளிபரப்பப்படும் காலை பக்தி பாடல்களை கேட்டுக்கொண்டிருப்பார்.

இதற்குள் அம்மாவோ இல்லை பாட்டியோ குழந்தைகளை குளிப்பாட்டிவிட்டு தலை வாரி பின்னி விட்டு பூஜை அறைக்கு கூட்டிச்சென்று, தாத்தா கடவுளை கும்பிடும் முறையை சொல்லிக்கொடுத்துக்கொண்டிருப்பார். பூஜை அறையில் பிரார்த்தனை செய்யும் பொழுது ஒரு பிரார்த்தனையை மறக்காமல் சொல்லிக்கொடுப்பார். அது இதுதான்

"ஊரில் உள்ள மக்கள் எல்லோரும்

நோய் நொடி இல்லமால்

சந்தோஷமாக வாழவேண்டும்" என்பதுதான்

இதற்கு காச பணமா! நல்ல மனசுதானே வேண்டும்

எல்லா குழந்தைகளுக்கும் தேங்காய் எண்ணெய் தடவி படிய படிய தலை வாரி விட்டு நெற்றியில் குங்குமமோ விபூதியோ இல்லாமல் இருக்காது. இவ்வளவு குழந்தைகளுக்கும் தலை வாரி விட்டபின் வீட்டின் உள் ஒரு தலை முடி கூட கீழே இருக்காது. இதற்கு காரணம் என்ன தெரியுமா.

தலை முடிக்கு கேசம் என்று ஒரு பெயர் உண்டு. இந்த கேசத்தில் மும்மூர்த்திகளும் இருக்கிறார்கள். ஆம்.

கே-கேசவன் ச -ஈசன் ம் - பிரும்மா.

கேசம் காலில் மிதி பட்டால் மும்மூர்த்திகளின் நாயகிகளாக மஹாலக்ஷ்மி, பார்வதி, சரஸ்வதி மூவரும் மனம் கலங்கிவிடுவார்கள். கேசம் மிதி படும் வீட்டில் ஏன் தெரியுமா செல்வமில்லை, மனநிம்மதியில்லை, ஞானம் அறவே இல்லை. இவர்கள் யாருமே இல்லையென்றால் வேறு யார் வருவார். மஹாலக்ஷ்மியின் அக்கா தான் வருவாள்.மஹாலக்ஷ்மியின் அக்கா யார் தெரியுமா அவள் தான் மூதேவி.

இது வரை காலை களேபரம்.. இது ஓய்ந்த பின் வீட்டு மருமகள் மாமாவின் அழைக்கும் குரல் கேட்டு ஓடோடி வந்துநிற்பாள். ஓடோடி வந்து நிற்கவேண்டும் என்று மருமகளுக்கு தெரிந்திருக்கிறது. அவளை பெற்று வளர்த்தவர்கள் சொல்லி சொல்லி வளர்த்திருக்கிறார்கள். மாமாவின் உத்தரவிற்கு காத்திருக்கிறாள் மருமகள்.

மாமாவும் மாமியும் மருமகளை அழைத்து என்று என்ன சமையல் செய்யலாம் என்று மூன்று பெரும் கலந்து அன்றைய சமையலை முடிவுசெய்கிறார்கள். மருமகள் சமையல் அறையில் நுழையும்போதே மாமியாரும் நுழைகிறார். இந்த வயதிலும் மருமகளுக்கு உதவி செய்வதில் சளைக்கவில்லை.

அந்த சமையல் அறையில் ஒரு அழகான. கோட்டை அடுப்பு என்று ஒன்று இருக்கும்..பசுவின் சாணியை அடுப்பின் மேல் மெழுகி கோலம் போட்டிருக்கும் அழகே அழகு. சமையல் அறையில் பாத்திர பண்டங்கள் எல்லாம் பித்தளையோ அல்லது செப்பு பாத்திரங்களோ தான் இருக்கும். மருமகள் சமையல் முடித்துவிட்டு தங்களுடைய தோட்டத்தில் விவசாயம் செய்ய கிளம்பி விடுவாள்.

இவை எல்லாம் ஓய்ந்த பிறகு வயதான கணவனும் மனைவியும் (தாத்தா பாட்டி ) வீட்டின் முற்றத்தில் கால் நீட்டிக்கொண்டு பேசிக்கொண்டிருப்பார்கள். அப்பொழுது அங்கே வரும் சிட்டுக்குருவிகள் கூவி கூவி இவர்களிடம் சாப்பிட ஏதாவது கேட்டுக்கொண்டே இருக்கும். பாட்டியும் வீட்டில் குத்தி புடைத்த அரிசியின் குரணைகளை சிட்டுக்குருவிகளுக்கு போட்டு அதை அந்த சிட்டுக்குருவிகள் சாப்பிடும் அழகை பார்த்து ரசிப்பார்கள்.

இன்று ஒரு வீட்டில் கூட சிட்டுக்குருவிகள் வருவதில்லை. ஏன் தெரியுமா? செல் போன் டவர் இருப்பதால்தான் சிட்டுக்குருவிகள் வருவதில்லை என்று சொல்கிறார்கள். உண்மை அதுவல்ல.

முற்றங்களும் முதியவர்களும்

இல்லாத வீட்டிற்கு

சிட்டுக்குருவிகள் வருவதில்லை

ஆம் எல்லா வயதான பெற்றோர்களும் தாத்தா பாட்டிகளும் முதியோர் இல்லத்தில் தானே இருக்கிறார்கள். தனி மரம் தோப்பாகாது என்று சொல்வார்கள். ஆனால் இன்று எல்லா வயதான பெற்றோர்களும் தோப்பாக நிற்கிறார்கள் முதியோர் இல்லத்தில். அன்று வயதானவர்கள் எல்லாம் தங்களுடைய இறுதி காலத்தில் கங்கை கரைக்கு சென்று விடுவார்கள். தங்களுடைய இறுதி மூச்சு கங்கையில் நின்று போனால் மறு பிறப்பு இல்லை என்று நம்பினார்கள்.

ஆனால் இன்று கங்கை மாதா நாடு முழுவதும் பரவி ஓடுகிறாள். என்ன ஆச்சரியமாக இருக்கிறதா. ஆம் ஒவ்வொரு முதியோர் இல்லமும் ஓடும் கங்கைதான். எல்லா வயதான பெற்றோர்களுக்கும் அங்கே தான் இறுதி மூச்சு நின்று போகிறது..

எல்லா முதியோர் இல்லங்களும்

மனித காட்சிசாலைகள்

என்றோ தாயிடம் பால் குடித்த மிருகங்கள்

வந்து போகும் இடம் அது

அற்புதசாரல்கள் என்று சொல்லிவிட்டு என்னுடைய எண்ணச்சிதறல்களை சொல்லிக்கொண்டிருக்கிறான் என்று நினைப்பது நீங்கள் நினைப்பது எனக்குப்புரிகிறது.

நாம் நம் இயலாமைக்கு இன்றைய தலைமுறை குழந்தைகளை காரணம் காட்டிக்கொண்டிருக்கிறோம். இந்த அற்புதத்தின் நாயகி நாயகன் இருவரும் இன்றைய தலைமுறைதான். எல்லா திருமணமான தம்பதிகளை போலவே இந்த தம்பதிகளும் கனவுகளை சுமந்தபடி தான் இருந்தார்கள் அவர்கள் ரா.கணபதி அண்ணா எழுதிய தெய்வத்தின் குரல் படிக்கும் வரை. தெய்வத்தின் குரல் படித்த நொடியில் இருந்து தாங்கள் வாழவேண்டிய வாழ்க்கை இதுவல்ல என்பதை புரிந்து கொண்டு ஒரு இரவில் தங்களுடைய தோற்றத்தையும் வாழும் வாழ்க்கை முறையையும் மாற்றிக்கொண்டு வாழ ஆரம்பித்தார்கள்..

மற்றவர்களின் பேச்சோ கிண்டல் கேலியோ எதுவும் எடுபடவில்லை. இவர்கள் வாழும் அழகை பார்த்து மற்றவர்களும் மாறி வாழ முடிவு செய்தார்கள். இருவரும் படித்த பட்டதாரிகள். கணவர் கை சம்பாதித்துக்கொண்டிருந்தவர்.

கணவர் முகத்தில் அப்படியொரு தேஜஸ். மனைவி முக அழகு இந்த அஷ்ட லக்ஷ்மியும் ஒரு சேர அமைந்த முகம். கணவன் மனைவி இருவரும் ஒருவரை ஒருவர் விட்டுக்கொடுக்காமல் வாழும் அழகே அழகு.

இவர்கள் வீட்டில் கேஸ் அடுப்பு கிடையாது. நீங்கள் முதலில் படித்த பசுவின் சாணத்தால் மெழுகி கோலம் போட்ட கோட்டை அடுப்பில்தான் அன்றாடம் சமையல்.. தினமும் கிணற்று நீரில்தான் சமையல். வீட்டில் உள்ள பாத்திரம் எல்லாமே பித்தளை செப்பு பாத்திரங்கள்தான்.. அழகான மடிசார் கட்டு, பஞ்சகச்சம் வேஷ்டி கட்டு.

மிகச்சிறந்த புத்தகம் எதுதெரியுமா

புத்தகக்கடையையே புரட்டி போட்டு வாங்கிய புத்தகம் அல்ல

ஒரு முறை வாசித்தாலே உங்களை எந்த புத்தகம் புரட்டி புரட்டி போடுகிறதோ அதுவே மிகச்சிறந்த புத்தகம்

தெய்வத்தின் குரலும் அப்படிதான் சுரேஷ் பவானி வாழ்க்கையை ஒரே இரவில் புரட்டிப்போட்டது

இது வரை நான் எழுதியது போதுமென்று நினைக்கிறேன்.

இனி சுரேஷ் பவானி அனுபவத்தை அனுபவிப்போம்

என்னுடைய மனக்குமுறலின் நியாயம் உங்களுக்கு புரிந்திருக்குமென்று நினைக்கிறேன். உங்கள் கருத்துகளை எழுதி கமெண்ட்களாக போடுங்கள்.

https://www.youtube.com/watch?v=69uY3-DHFPI

Duration: 23 minitues and 23 seconds.

ஹர ஹர சங்கர ஜய ஜய சங்கர

காயத்ரி ராஜகோபால்


No tags yet.
Recent Posts
Archive
Search By Tags
No tags yet.
Follow Us
  • Facebook Basic Square
  • Twitter Basic Square
  • Google+ Basic Square